Како се наближуваат изборите, и политичките партии ја менуваат реториката на обраќањата кон народот. Дури и оние кои ветија дека својата кампања ќе ја базираат исклучиво на ветувања за иднината, не одолејаа и ја прифатија “прљавата игра“. Деновиве можат да се слушнат секакви коментари, лични навреди, да се прочитаат секакви колумни, во кои не се одбираат зборовите.

По радијата кружат платени политички реклами во кои, наместо да се презентира сопствената програма, се негодува за случувањата на политичкиот опонент во минатото. Лидерот на ВМРО-ДПМНЕ, Груевски, кој на почетоток на кампањата велеше дека ќе се фокусира само на сопствената програма, без напади кон неговиот опонент Црвенковски, може да се забележи дека ни малку не си го одржа зборот.

И опозиционите партии во трка за гласови, на своите митинзи презентираа груби говори. Црвенковски, исмејувајќи ја целата кампања која се води против него, што е особено чудно, бидејќи тој не е кандидат за пратеник ниту во една изборна единица, а не изостанува ни лидерот на ОМ, Љубе Бошковски, со своите говори полни со прозивања и директни навреди кон владејачката ДПМНЕ.

И пишаните медиуми не се изоставени. Деновиве во еден од весниците осамна колумна со наслов и насловна страница преполна со лични обвинувања и вулгарни зборови.

Сѐ на сѐ, во моментот политичката култура е на многу ниско ниво. Граѓаните се надеваат дека ваквите случувања ќе завршат заедно со предизборната кампања и нема да се одразат на денот на гласањето, бидејќи тоа би оставило црна дамка и би не уназадило во процесот на евро-интеграциите.